Nalungkot ang mga plantito at plantita sa anunsiyo ni Tuesday Vargas na isasara niya na ang kanyang online plant shop.
Sa isang Instagram video, Agosto 20, kinuwento ng komedyante kung paanong bata pa lang siya ay mahilig na siyang mag-indoor gardening at kung bakit niya napagdesisyunang magbenta ng halaman, bago pa ito maging uso ngayong may quarantine at nananatili sa bahay ang mga Pinoy.
Hindi niya napigilang lumuha nang kausapin na ang aniya’y mga netizen na sinasabing “overpriced” ang mga halaman niya.
“Naiiyak ako kasi sinasabihan n’yo ako na mukha akong pera, na oportunista ako, na nanloloko ako ng tao. Hindi po ako tatagal sa showbiz nang halos dalawampung taon kung ganyan po ako,” sambit ni Tuesday.
“At ang pangalan na pinagtrabahuan ko at inalagaan ko ng maraming taon ay hindi makikilala ng maraming Pilipino kung siraulo ako at tarantado akong tao.”
Sabi ni Vargas, natural lang na tataas ang presyo dahil sa tumaas na demand sa mga halaman habang may pandemya. Halos kaunti na nga lang aniya ang pinapatong nilang mga plant seller sa kanilang mga produkto, at ang kliyente aniya ang iniisip niya kapag nagbebenta.
“Ako ‘to e, pagkatao ko ‘yung sinisira n’yo e. Hindi naman ako kriminal, hindi naman ako mamamatay-tao. Nagtatanim nga ako kasi gusto ko ng maayos na environment para sa mga bahay ng mga kumukuha ng halaman sa akin. Kasi lahat tayo, nakakulong. Anim na buwan na tayong nakakulong.”
“Wala kaming ginawa kundi umikot-ikot dito sa bakuran, [isipin] ‘Ano bang kailangan ni mam?’ ‘Ano kaya ‘yung bagay sa kanya?’ Iniisip ko kayo! Iniisip ko anong magpapasaya sa inyo; mamaya na ako,” aniya pa.
Natapos na ni Tuesday ibenta ang mga natira niyang halaman, bukod sa mga rare plant na napagdesisyunan niyang panatilihin “para di naman ako sobrang malungkot.” Naibenta niya na rin ang ilang item gaya ng white pot at gardening shears.
“Ako ay titigil na sa pagbebenta at hindi na po talaga kaya ng spirit ko na mabastos nang ganun na lamang,” pahayag ni Tuesday matapos ang breakdown niya.
“Mahal ko po kayo at masaya akong nakilala ko kayo dito. Pero talaga pong hindi ko na kaya na magpatuloy pa sa ngayon. Madami naman pong mahuhusay na ibang sellers at sa kanila po ay makakakuha pa kayo ng nga dream plants nyo,” aniya pa.
Dahil dumami ang mga gustong maghalaman ngayong pandemya, plano ng Department of Trade and Industry na i-regulate at buwisan ang mga plant seller at ang buong industriya.
The post Tuesday Vargas sa mga bashers: “Sinisira n’yo pagkatao ko” appeared first on Daily Trending Feed.
Source: Daily Trending Feed
