Kung popular sa noontime show viewers ang “Bawal Judgmental” ng Eat Bulaga, gumagawa naman ng ingay ang “Bawal Peyk News” segment ng Happy Time, ang bagong noontime game show ng Net25.
Ang “Bawal Peyk News” ang isa sa mga nakakaaliw na game segment na napapanood sa unang bahagi ng noontime program nina Janno Gibbs, Anjo Yllana, at KitKat.
Positive ang mga feedback sa “Bawal Peyk News” kaya nagpapasalamat si Janno sa mga tumatangkilik sa kanilang barely two-week-old show.
Ikinagulat naman ng mga host at production staff ng Happy Time ang resulta ng PEP poll tungkol sa mga noontime show na pinapanood ng PEPsters dahil nanguna ang kanilang programa.
Eighty-six percent (86%) ang bumoto sa Happy Time para maiba naman; 8% ang boto na tinanggap ng It’s Showtime pa rin, ma-cable or online; at 7% ang pumili sa Eat Bulaga! dahil solid viewers sila ng programa.
May mga haka-hakang mataas ang botong nakuha ng Happy Time dahil tulad sa mga eleksyon, “bloc voting” ang ginawa ng mga miyembro ng Iglesia Ni Cristo bilang suporta sa programa at TV network na pag-aari ng kanilang simbahan.
Si John Paul “JP” Panizales ang direktor ng Happy Time.
Hindi rin siya makapaniwala nang makita ang resulta ng PEP poll, pero ipinagpapasalamat niya sa Diyos ang magandang balita.
“Sobrang flattering po at lalong nakakaganang magtrabaho dahil never naman kami nag-expect na ganun ang kalalabasan ng poll.
“Ginawa po namin ang Happy Time para lang magpasaya sa panahon ng pandemya.
“Nagpapasalamat po kami sa Panginoon sa sobra-sobrang blessings na ibinibigay sa amin,” pahayag ni JP nang makausap siya ng Cabinet Files.
BATTLE OF NOONTIME SHOWS
Tanggap ni JP ang sinasabi ng publiko na mahigpit ngayon ang kumpetisyon ng mga noontime show dahil matitindi at subok na ang mga katapat ng Happy Time—ang It’s Showtime ng Kapamilya Channel at Eat Bulaga! ng GMA-7.
Sa Oktubre, lalong magiging mahigpit ang rivalry ng mga pangtanghaling programa dahil sa pagsisimula ng Laugh Out Loud ng TV5.
Pero para kay JP, walang kumpetisyong nangyayari.
“Sa totoo lang po, wala pong kumpitensiya para sa amin kaya magaan lang kaming magtrabaho.
“I guess, mas nakakabuti kasi HAPPY lang kami kaya naipapasa ng mga host ang happiness sa viewers.
“Sa amin po, mas masaya ‘yon para mas maraming mapanood ang mga kababayan natin.
“Tulad nga po ng sinabi ko, walang kumpetisyon sa amin kaya walang pressure. Mas pressure sa amin ang mapasaya ang ating mga kababayan at matulungan sila sa panahon ng pandemya.”
Nang kumustahin namin kay JP ang working relationship nito kina Janno, Anjo, at KitKat, sinabi niyang magaan katrabaho ang tatlo, pati ang production staff ng Happy Time.
“Hindi po nahirapan ang buong production working with our hosts.
“Sa amin kasi, everyone is open to suggest, kahit utility namin, mga P.A., lahat po pinapakinggan namin, lahat pwedeng mag-suggest.
“Ang motto po talaga namin sa show is always, HAPPY LANG!”
Sa tanong tungkol sa pagkakaiba ng Happy Time sa Eat Bulaga! at It’s Showtime, sumagot si JP na walang ipinagkaiba ang intensiyon nila sa motibo ng mga noontime program ng GMA-7 at Kapamilya Channel.
“I guess, walang difference when it comes to our intentions dahil pare-pareho naman ang aming mga layunin—ang makapagpasaya at makatulong.
“Siguro po, ang difference is, kami ay bagito pa, while sila po mga beterano na.
“Patuloy kami sa pagsisikap na mas mapaganda at mapasaya pa ang Happy Time. In fact, nagpalit kami ng segment at nagdagdag ng bago, not because hindi maganda but because we want to improve more.
“Plus, sobrang maingat kami sa pag-comply sa safety protocols ng gobyerno kaya naisip naming palitan muna yung segment na delikado po.
“Also, maganda din po ang reaksiyon ng mga tao sa segment namin, ang Mask-Sunurin.'”
Source: PEP.ph
Source: Daily Trending Feed
